ទង្វើមិនប្រក្រតីរបស់មន្ត្រីគយខេត្តបន្ទាយមានជ័យ នៅតែប្រឈមនឹងការរិះគន់
06-July-2016 | ដោយ មែន កំសត់
បើទោះបីរឿងអាស្រូវរបស់មន្ត្រីគយនៅខេត្តបន្ទាយមានជ័យ ត្រូវបានលាតត្រដាងជាបន្តបន្ទាប់យ៉ាងណាក៏ដោយ ក៏លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករ មិនទាន់ចាត់វិធានការទៅលើមន្ត្រីគយខិលខូចពុករលួយទាំងនោះឡើយ។ ទង្វើមិនប្រក្រតីរបស់មន្ត្រីគយខេត្តបន្ទាយមានជ័យ ក្រោមការគ្រប់គ្រងរបស់លោក ឆែ សុធា ត្រូវបានក្រុមអ្នករត់តាក់ស៊ី អ្នកបើករថយន្តឈ្នួលដឹកទំនិញ លាតត្រដាងជាបន្តបន្ទាប់ ក៏ប៉ុន្តែលោក គុណ ញឹម ធ្វើមិនដឹងមិនឮអ្វីទាំងអស់ចំពោះការរិះគន់នោះ។ ប្រការនេះហើយដែលធ្វើឲ្យលោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ ព្រមទាំងបក្ខពួកក្រោមឱវាទ ជាពិសេសគយចល័តបង្កើតកុងត្រូលជជុះលើផ្លូវជាតិលេខ៥ ជំរិតយកលុយពីឈ្មួញនិងអាជីវករដឹកជញ្ជូនទំនិញ ក៏ដូចជាជំរិតយកលុយពីអ្នករត់តាក់ស៊ី និងអ្នកបើករថយន្តឈ្នួលតាមអំពើចិត្ត។
មន្ត្រីរាជការនិងប្រជាពលរដ្ឋក្នុងខេត្តបន្ទាយមានជ័យ បានរិះគន់ថាបន្ទាប់ពីលោក ឆែ សុធា មកធ្វើជាមេគយប្រចាំខេត្តនេះ គឺបណ្ដោយឲ្យកូនចៅក្រោមឱវាទធ្វើអ្វីៗតាមអំពើចិត្ត ជាពិសេសការប្រមូលលុយតាមរបៀបពុករលួយដោយមិនខ្វល់ពីការរិះគន់អ្វី ទាំងអស់។ តាមការអះអាងរបស់មន្ត្រីគយតូចតាចក្នុងខេត្តបន្ទាយមានជ័យ បានឲ្យដឹងថាលោក ឆែ សុធា មានលោក គុណ ញឹម ជាខ្នងបង្អែកដ៏រឹងមាំនៅខាងលើ ទើបហ៊ានធ្វើអ្វីៗតាមអំពើចិត្ត ជាពិសេសការបើកដៃឲ្យមន្ត្រីគយក្រុងប៉ោយប៉ែត ជំរិតយកលុយពីអ្នករត់តាក់ស៊ី និងអ្នកបើករថយន្តឈ្នួលទាំងយប់ទាំងថ្ងៃ។
ប្រភពពីឈ្មួញ អាជីវករ និងអ្នករត់តាក់ស៊ីមួយចំនួនបានឲ្យដឹងថា ទោះបីពួកគាត់ដឹកជញ្ជូនទំនិញដែលបង់ពន្ធត្រឹមត្រូវឲ្យសមត្ថកិច្ចគយ នៅច្រកព្រំដែនតាមច្បាប់យ៉ាងណាក៏ដោយ ក៏ក្រុមគយចល័តលើផ្លូវជាតិលេខ៥នៅតែគាបសង្កត់ឲ្យបង់លុយតាម ការកំណត់របស់ពួកគេទើបគ្មានការរំខាន។ ឈ្មួញខ្លះបានឲ្យដឹងថា ចាប់ពីច្រកព្រំដែនប៉ោយប៉ែត ទៅដល់ទីរួមខេត្តបន្ទាយមានជ័យ មានប៉ុស្ដិ៍ត្រួតពិនិត្យរបស់គយ៣កន្លែង គឺនៅសង្កាត់និមិត្ត ក្រុងប៉ោយប៉ែត នៅសាលាក្រហមស្រុកអូរជ្រៅ និងនៅក្បែរមន្ទីរសាធារណការខេត្ត។ កុងត្រូលជជុះរបស់គយខេត្តបន្ទាយមានជ័យទាំង៣កន្លែងនេះ កំពុងបង្កការលំបាកយ៉ាងខ្លាំងដល់ប្រជាពលរដ្ឋដែលដឹកជញ្ជូនទំនិញ ឆ្លងកាត់ ព្រោះមន្ត្រីគយជំរិតយកលុយតាមរបៀបពុករលួយដោយគ្មានញញើតអ្វីឡើយ៕
ចំនួនអ្នកទស្សនា
- ថ្ងៃនេះ1681
- ម្សិលមិញ4501
- សប្តាហ៍នេះ1681
- ខែនេះ11381
- ឆ្នាំនេះ254621
- សរុប20697077